مالا تعرفه عن استاذ الجامعه؟؟؟؟؟؟؟؟ محطات فى حياتة !!!!!!!!!!!!!!!!!!!

يا ترى مين هو استاذ الجامعة وبيشتغل كام ساعة؟؟

المحطة الأولى: وهو طالب

استاذ الجامعة يا سيدي ده بني آدم طلع عينه 4 سنين و 6 سنين لو في كلية طب، وهو في الكلية زمايله عايشين حياتهم طول السنة أو الترم وبيذاكروا من ملخصات ليلة الامتحان وهو مقضيها طول الترم كتب ومكتبة ومراجعة ومذاكرة عشان يطلع الأول ويبقى معيد

المحطة الثانية: وهو معيد

قوم ربنا يكرمه ويبقى معيد وأصحابه اللي مقضيينها يتعينوا في بنوك ونيابات واتصالات وخلافه بمرتب ضعفه ويخلصوا شغلهم يروحوا بيوتهم وينسوا الشغل لغاية ما يروحوه تاني يوم.
قوم هو بقة كمعيد في الجامعة يشتغل سكاشن ويذاكر دبلومة مهنية ودبلومة خاصة وتمهيدي ماجستير وياخد 6 دورات تنمية قدرات وتويفل و icdl ومذاكرة ليل نهار وأبحاث وتجارب وزيارات ميدانية وتعديلات قبل المناقشة وتعديلات بعد المناقشة ومطلوب منه ينشر ابحاث قبل ما يترقى ويكون مدرس مساعد ويتسلف من ده وده ويكون مديون لطوب الأرض وهوب بقة أصبح مدرس مساعد.

المحطة الثالثة: وهو مدرس مساعد

قوم ايه قبل ما يفوق يلاقي مطلوب الدكتوراة وياخذ نفس الجولة سكاشن ويذاكر تمهيدى دكتوراة و تسجيل وتحضير وأبحاث وتجارب وزيارات ميدانية وتويفل تاني و icdl تاني ودورات تنمية قدرات تاني وكوابيس مناقشة ومناقشة وتعديلات وهوب لا استنى كل الكليات تعمل الهوب دي وتبقى مدرس؛ لكن بتوع طب يركنوا على جنب فيه امتحانات فرست وسكند يا ناصح مش هتدخل في الزحمة.
أخيرا بقيت مدرس؟؟ فرحان عشان مبقتش هيئة معاونة؟؟ الحياة ضحكت لك؟؟؟ ايه ام التفاؤل ده؟؟؟ انسى يا عمرو

المحطة الرابعه: وهو مدرس

ابدا يا ناصح اشتغل أبحاث الترقية عشان تبقى استاذ مساعد والمرة دي خمس أبحاث وتوصل ل 8 في بعض التخصصات وفيه تخصصات لازم تنشر دولي من الاخر ف كل الأحوال هيتخرب بيتك مصاريف وبعد ده كله لجنة الترقيات ممكن تسقطك عادي جدا وتبقى تشرفنا بعد سنة وتعمل أبحاث جديدة... وبرضو كتب ومراجع وأبحاث وتجارب و6 دورات تنمية قدرات..... رايح فين انت نسيت المحاضرات؟؟؟ محاضراتك 3 ايام في الاسبوع ومحاضرات كل يوم محتاجة يوم تحضير وكل محاضرة هي امتحان جديد من الطلاب ليك وقدرتك على الشرح وتوصيل المعلومة.
المهم مبروك وهوب بقيت استاذ مساعد.

المحطة الخامسة: وهو استاذ مساعد

رايح فين نفس اللفة اللي فاتت علشان تكون استاذ مساعد من ابحاث و6 دورات ولجنة ترقيات دي ادخلها تاني بقة عشان تبقى استاذ..

المحطة السادسة: وهو استاذ

وهوب بقيت استاذ والف الف مبروك كدة مش مطلوب منك اي حاجة تاني ووصلت لأعلى درجة... رايح فين استنى بص ورا خالص فاكر زمايلك اللي كانوا مش بيذاكروا في الاول دول واتعينوا في وظايف تانية كلهم اترقوا من غير كل اللي اتعمل فيك ده..
بصيت وراك واكتأبت متزعلش الحاضر أهم بص حواليك كدة؟؟
ايه ده مين الناس اللي معايا في البيت دول؟؟؟
ياااه الست دي انا فاكره بس شعرها مكانش ابيض كدة ولا كانت كبيرة كدة يا نهار منيل دي مراتي...
ومين الرجالة والستات دول دول ومين العيال الصغيرة دي دول شبه ولادي.... يا لهوي الستات والرجال دول ولادي انا فاكر شوفتهم لما كانوا صغيرين كام مرة كنت مشغول بالماحستير والدكتوراة والأبحاث والترقيات والعيال الصغيرة دول أحفادي.
وايه كمية الأدوية دي كلها؟؟؟ دي أدوية السكر والضغط والقلب كل دي أمراض جات لي وانا في رحلتي دي؟؟؟
لما اشوف اصحابي بقوا فين من سنين مشوفتهمش اسال مراتي تقولي نصهم مات والباقيين زي حالاتي.
افتح الجرايد اشوف ايه اخبار الدنيا.... ايه ده؟؟ مين ده؟؟؟ ده واحد بيقول هم أساتذة الجامعة بيشتغلوا كام ساعة؟؟؟

Best Wishes: Dr.Ehab Aboueladab - Email:ehab10f@gmail.com