تجربتي لأداء العمرة بفيزا السعوديه ترانزيت الجديدة :
البوست طويل حبتين معلش عشان حبيت اكتب كل حاجه 😅😅
في البداية حابب اوضح بعض النقاط المهمه والي أكدت عليها الخطوط الجوية السعوديه :
١- لازم وجهة الطيران تكون الى بلد اخرى زي لبنان او الاردن او الامارات، في حاله الذهاب والعودة لازم يكونوا مؤكدين ( في ناس كتبت انها جربت تعمل حجز ذهاب منفصل عن العوده وعدوا بيها ، عن نفسي حجزت الاتنين نفس الحجز ونفس شركه الطيران ) وساعتها هتاخد اختيار انك تعمل ترانزيت في الذهاب او في العودة .
٢- في حاله ان حجزك ذهاب وعوده على نفس الحجز مينفعش تكسر الحجز في النص ومتكملش الرحله للاخر لان دا هيلغي التذكره بالكامل . كمثال اقترحه بعض الناس ان لو رايح الاردن ترانزيت جدة اول ما تنزل جدة تخرج ومتكملش للاردن وفي العوده تاخد نص الطريق من جده لمصر فقط. سألتهم شخصيا في المطار وقالو هتتلغي باقي الرحله كلها ومعرض تدفع غرامه.
٣- الخطوط السعودية اكدت ان مفيش باركود مطلوب حتى الان من قبل بوابه الحج والعمره في مصر
=======================
*** الحجز :
انا كنت بدور على بلد ملهاش فيزا للمصرين كان اودامي حلين اما لبنان او الاردن ، لبنان اقصى مدة ترانزيت لقيتها كان ٣ ايام ، ولقيت الاردن فيها رحلات بتوفر ترانزيت ٤ ايام ، ف اخترت الاردن
*** طريقه الحجز :
دخلت على موقع الخطوط الجوية السعوديه واخترت رحله من القاهره الى الاردن ذهاب وعوده بعد ٤ ايام ( لو هتحجز ذهاب وعوده على نفس الحجز لازم الفرق بين التاريخين يكون مساوي او اكبر من المده الي انت عايزها للترانزيت عشان يديك اختيارات يعني مينفعش تختار ذهاب وعوده بعد يوم واحد وتدور على ترانزيت ٤ ايام ، ف لو عايز ٣ ايام مثلا يبقى على الاقل يكون بين الذهاب والعوده ٣ ايام او اكتر ) ، هتلاقي الموقع بعد ما تدوس على البحث هيديك اختيار لو عايز تعمل عمره وتختار اما تكون في الذهاب او في العودة ، لو اخترت في الذهاب دا معناه انه هياخد عدد من الايام بين الذهاب والعوده يخليها ترانزيت في جدة والباقي في البلد الي هتروحها
كمثال في الصور تحت ، اخترت القاهره الاردن ذهاب يوم ١٦ فبراير وعوده يوم ٢١ يعني خمس ايام ، واخترت اني اعمل عمره في الذهاب واخترت رحله من القاهره لعمان فيها ترانزيت جدة ٣ ايام فكده فاضل يومين تقضيهم في الاردن الي هو ٢٠ و ٢١ ، فتلقائيا هو هيجيبلك رحلات العوده من عمان للقاهره في اخر يوم الي هو ٢١
في حالتي انا اجمالي الرحله الذهاب والعوده كان ٤ ايام خليتها ونص فاخترت ترانزيت في العوده ، فروحت الاردن حوالي نص يوم وفي العوده من الاردن نزلت ترانزيت ٤ ايام في جدة ثم القاهره
بعد اختيار الرحلات بتملا بياناتك وبعدها هتلاقي صفحه فيها اختيار انك تقدم على الفيزا بتوديك لصفحه تانيه تملا بيانات وهتلاقيه زود 780 جنيه تقريبا
سعر التذاكر : انا حجزت قبلها ب ٥ ايام لظروف شغلي فكانت غاليه شويه ، لبنان اقل سعر لقيته كان ١٢٢٠٠ ترانزيت ٣ ايام ، الاردن كان في ب ١٢٨٠٠ بس انا اخترتها felixable فبقت ب 14000 وترانزيت ٤ ايام ف اخترت الاردن . طبعا في اسعار اقل بكتير لو حجزت بدري شويه بس انا كنت محكم بإجازة .
الفيزا بتبقا نوعها فيزا مرور او ترانزيت ، دخول مره واحده صلاحيتها ٣ شهور بس المده المسموح لك فيها داخل البلد هي ٤ ايام كحد أقصى
======================
تجهيزات بعد حجز الطيران:
*** تطبيق نسك :
بتوصل الفيزا في خلال ساعه مثلا من الحجز ، بعدها تنزل تطبيق نسك وتسجل مستخدم جديد وتدخل رقم التاشيره وتختار حجز للعمره وتختار التاريخ والوقت وبعدها هيأكدلك الحجز ويديك تصريح بباركود ، بعدها احجز للروضه لو انت هتروح المدينة ، ضروري جدا مش هتدخل الحرمين من غيرهم مهما حاولت وفي الوقت الي انت اخترته فقط .
*** باركود الاردن :
لو رايح الاردن لازم تقدم على باركود قبل السفر ب ٧٢ ساعه احتمال يتطلب منك على الكاونتر او قبل دخول الطياره او هناك في جوازات الاردن هحط اللينك في الكومنتات
*** تجهيز بعض الاوراق :
١- تصريح امني لو مش مكتوب ليك وظيفه في الباسبور ، في حالتي مكتوب مهندس حر فمكنتش محتاج
٣- تصريح الجيش لو مكتوب في الباسبور مطلوب للتجنيد
*** متطلبات احتمال تتطلب منك وانت وحظك :
١- حجوزات فنادق ، في حالتي محدش طلبها مني في مصر بس في الاردن قولتلهم على اسم الفندق
٢- اثبات عمل في مصر ، في حالتي محدش طلبه بس سألو عليه في الاردن ، واخدت hr letter من الشركه احتياطي
٣- فلوس تكفي مده الرحله مش اقل من ١٠٠٠ دولار لو الاردن و ٢٠٠٠ لو لبنان ، في حالتي محدش طلب مني لاني كنت رايح ١٠ ساعات بس وقولتهم اني رايح ترانزيت مش سياحه
==================
الانتقالات :
*** من مطار جده لمكة والعكس في ٣ طرق :
- قطار سريع لو حجزته من بدري بحوال ٣٤ ريال اونلاين من الموقع بتاعهم او التطبيق ، لو في المطار انت وحظك في ناس حجزت ب ٥٥ تقريبا وفي اغلى حسب الضغط ، اخر ميعاد بيبقا الساعه ١١ بليل يعني لو طيارتك الفجر دا مش اختيار
- باصات ببلاش للحرم لو انت لابس الاحرام بتبقا كل ساعتين من مطار جدة ومن مكة بردو، بتاخد ساعه ونص في الطريق ، حطيت صوره للبروشور بتاعهم ، ودا اختيار رائع بصراحه ، بس اخره الساعه ١٠ من مطار جده واخره ١٢ من مكة يعني لو جاي الفجر مش هتلاقيه
- عربيات خاصه بتبقا واقفه اودام مكان حجز القطار وعند الباصات بتحمل لمكه الفرد بيبقا بالاتفاق من ٥٠ ل ٧٠ ريال حسب الوقت والضغط
**** من مكة للمدينه والعكس :
- قطار سريع بياخد ساعتين سعره على النت لو حاجز من بدري ١٣٠ ريال تقريبا و ٢٠٠ لو الدنيا زحمه
- باصات النقل الجماعي بتبقا كل ساعتين بتتحجز اونلاين ب ٦٦ لو باص عادي و ب ١٠٠ لو باص فاخر وتقدر تحجز من المحطه نفسها ، بياخد ٥ ساعات
- عربيات خاصه بتحمل بالفرد في موقف النقل الجماعي ، الفرد بالاتفاق متوسط ٧٠ ريال اقل او اكثر حسب الضغط
*** من المدينة لجدة :
قطار بردو ب ١٧٢ ريال ، او طيران ناس مثلا بحوالي ١٥٠ ريال او اغلى شويه حسب حاجز امتى
==================
الفنادق :
الفتره دي زحام شديد في كل مكان والفنادق مليانه على الاخر عشان شعبان ورمضان .
مكة :
حجزت عن طريق صديق لي عنده شركه سياحه ، في فندق ابراج الكسوة قريب من الحرم ، الغرفه المزدوجة ب ١٣٠ ريال في الليله والفندق فيه باصات من والى الحرم كل ١٥ دقيقه ، سعره على بوكينج كان ٢٠٠ ريال بعد الخصومات في الفتره الي حجزتها ، لو حد حابب اوصله بيه يبعتلي وهبعتله رقمه.
الاردن عمان :
حجزت فندق جنب المطار بدقايق ، عنده عربيات بتوصل من و للمطار على مدار ٢٤ ساعه ببلاش اسمه Faraseen عباره عن شقق فندقيه نضيفه بصراحه كلفني حوالي ٥٥ دولار الليله في استوديو شخصين او ٣ على بوكينج، وتقدر تحجز عن طريق واتس اب وتدفع هناك كاش ٦٥ دولار
المدينة :
محجزتش فيها لان الفنادق غاليه جدا وخليتها صد رد
==================
شروق يوم العمليه :
*** مطار القاهرة
توقع ان تلاقي الموظفين مش عارفين نوع الفيزا دي فخليك ثابت على موقفك ومهما يقول اكد ان مفيش باركود مطلوب للفيزا دي
في lounge موجوده في terminal 2 بعد الجوازات عند بوابه E04 تبع mastercard كانت كويسه جدا وفيها اوبن بوفيه ونت سريع وكراسي مساج 😅😅 ، الحمامات نضيفه وفي كتير بيحرموا فيها ، الصور تحت
***** مطار الملكة علياء في عمّان :
في كتير كانوا كاتبين ان الفيزا للمصرين ٤٠ دينار او ٥٥ دولار ودا مش حقيقي هي ببلاش تماما ، روحت الشباك الظابط استغرب طبعا اني جاي من جدة ورايح جدة بعدها ب ١٠ ساعات ، سألني على شغلي فين ورديت ووريته حجز العوده وحجز الفندق ، فقالي انتظر ٥ دقايق وهناديك ، بعدها ناداني مدير الجوازات قالي انت جاي تجدد اقامه السعوديه قولتله لا انا جاي عشان عمره ونازل ترانزيت هنا ١٠ ساعات وحاجز فندق لليله دي ، ف ختم الجواز ومشيت
وانت مسافر من الاردن بعد الجوازات فيه lounge ظريفه ل ماستر كارد فيها اوبن بوفيه ونت سريع ومكان للنوم بس بيشترط ان الطياره تكون خلال ٣ ساعات بس انا شوفت ناس نايمه من بدري ف ممكن تكون بالحب . الحماماع نضيفه جدا وانا لبست الاحرام هناك
**** مطار جدة :
المطار فيه نت في كل مكان ، هتلاقي شركات الاتصالات في كل حته ، اوعى تشتري منهم لانهم غالييين جدا جدا جدا ، سعر الشريحه من ١٠٠ ريال ل ٣٠٠ ريال وهي في كل مكان في الشارع ب ٣٠ ريال . بعد الخروج هتلاقي يفط للقطار وهتلاقي في اكوا فيها حوض سمك كبير جنبه سلم بينزل على باصات الحرم المجانيه هياخدو بياناتك وتركب
الخطوط الجوية السعوديه بتنبه في الطياره قبل ما تعدي على الميقات ب نص ساعه عشان لو حد حابب يحرم في الطياره بس انا انصح انك تحرم في المطار بعد الجوازات عشان بتبقا الطياره زحمه والحمامات ضيقه
=================
ملحوظات
اعمل اونلاين check in واختار الكرسي من بدري ، وقبل ما تطلع الطياره بشويه ادخل شوف الكراسي الفاضيه وغير الكرسي ، ممكن تلاقي كرسي extra leg او تختار كرسي مفيش جنبه حد
في مكة :
في شرايح بتتباع في الشارع وفي كل مكان ب ٣٠ ريال بتدي حوالي من ١ جيجا ل ٢ جيجا ، عن نفسي اشتريت eSim اونلاين ب ٥ دولار كانت كويسه جدا بس نت فقط عن طريق تطبيق اسمه Airalo
الحرم له باصات مجانيه في مكة ولها محطات كتير ، يعني لو نزلت من القطار السريع هتلاقي اودامه محطه لباصات مجانيه الحرم ونفس الكلام لو جاي باص
الدخول لصحن الحرم للمحرمين فقط ، اما المصلين بيبقو فوق الادوار العليا فاعمل حسابك ان المره الوحيده الي هتبقا قريب نن الكعبه هي وانت بتعمل عمره فخد وقتك
اسعار المطاعم من ١٢ ريال زي البيك مثلا
تبديل العمله ممكن المطار او ابراج الساعه اودام الحرم ، واوعى تبدل جنيه مصري لانه سعره في الارض هنا ، بتوصل ل ٢٠ جنيه الريال الواحد.
تقدر تعمل كذا عمره لكذا شخص لو مريض او متوفي ، بعد ما تخلص عمرتك وتتحلل تروح ميقات التنعيم ب ٣٠ ل ٤٠ ريال عربيه تستناك لحد ما تحرم تاني وترجعك الحرم
التكلفه التقريبيه :
١٤ الف تذكره ( بتوصل ل ١١ الف او اقل لو حاجز بدري ) + تقريبا ٧٨٠ تأشيره ترانزيت + ١٧٠٠ ليله في الاردن لشخصين + ٣٣٠٠ جنيه اقامه ٣ ليال في مكة غرفه مزدوجه لشخصين + ١٢٠٠ باص رايح جاي من مكه للمدينه ، ومن مكه لجده اخدت الباص المجاني = حوالي ٢٠ ألف لو شخص لوحده وهتقل شويه لو ٢ عشان الغرف المزدوجه ، تكلفه مرضيه بالنسبالي ل ٤ ايام
============
ارجو ان اكون افدتكم ، متنسونيش من دعائكم وربنا يكتب لكم جميعا زياره بيته ويتقبل منكم ❤
