أالتسجيل لامتحان Prometric وتوثيق الشهادات (آخر مؤهل + شهادة الخبرة) عن طريق موقع ال DataFlow
من خارج المملكة
--------------********-----------
باديء ذي بدء
أصعب حاجة في الموضوع من وجهة نظر كثير منا -وده اللي بيخليه ما يمشيش في الموضوع- هي:
(إزاي هدفع فلوس على النت وكمان بالدولار أو بالريال السعودي؟؟؟!!!!)
والمفاجأة إن دي أسهل حاجة في الموضوع!!!
إزاي؟؟!!
هتروح البنك الأهلي المصري وهتقولهم: أنا عاوز اعمل فيزا للدفع على الانترنت (اسمها "بطاقة الدفع")
بتتعمل بصورة البطاقة فقط، بدون حساب بنكي، رسومها ١٥ جنيه فقط، والتجديد سنويا ب١٠ جنيه فقط، لازم تحط فيها ٢٠ جنيه على الأقل، ومعاك لغاية ٥٠٠٠ جنيه، وممكن تطلع ٣ بطاقات منها لك في وقت واحد
تسحب منها فلوس من المكنة براحتك (رسوم ٢ جنيه فقط)، تشتري بها شراء مباشر من أي محل، وأحلى حاجة فيها إنك ممكن تدفع بها على الانترنت بأي عملة (بتحاسب على سعر البنك المركزي المصري + عمولة ٣.٥٪ على كل معاملة)
وممكن تحط فيها فلوس من أي ماكينة إيداع تابعة للبنك الأهلي
بتحتاج في كارت الفيزا: ٣ حاجات مهمة
ال١٦ رقم اللي من قُدَّام
وتاريخ الصلاحية(م. 02/19)
والرقم السري: اللي هو أول ٣ أرقام على الظهر
_____________________________
او اى بنك تانى قريب منك
انا مثلا عملت فى ال cib واخجتها وانا واقف علطول
--------------********-----------
١. طيب هو إيه الموضوع أصلا؟؟!!
الفكرة إن حضرتك لو هتشتغل في المجال الطبي في السعودية ، يبقى لازم يكون معاك ترخيص من هيئة التخصصات الصحية السعودية (حاجة كدة زي إدارة التراخيص عندنا في مصر اللي جنب المعامل المركزية)
كأنه {ترخيص مزاولة مهنة}
--------------********-----------
٢. الترخيص ده بيتطلب حاجتين:
أ. اجتياز امتحان البرومترك"Prometric" والحصول على "Score" معين حسب تخصصك والصفة التي تريد الترخيص عليها (فنى مختبرات - فنى ميكروبيولوجى - فنى كيمياء حييويه- اخصائى ميكروبيولوجى - اخصائى كيمياء حيويه -اخصائى تقنية مختبرات - اخصائى اول -- استشاري)
ب- توثيق آخر (أعلى) مؤهل حصلت عليه وتوثيق شهادة الخبرة عن طريق موقع الDataFlow
ولكن قبل شرح كل منهما لابد من عمل شئ في الأول ألا وهو التسجيل على موقع "ممارس"
--------------********-----------
طيب نبدأ الخطوات العملية واحدة واحدة
--------------********-----------
أولا:
جهز شهاداتك كلها (((((المتاحة)))) حسب مؤهلك) وباسبورك وشهادة خبرتك (+/- ترخيص مزاولة المهنة أو شهادة النقابة)
١. شهادات البكالوريوس وبيان درجات البكالوريوس.
٢. شهادة الدبلومه او الدبلومات الى معاك كلها مع بيان د الدرجات تبعها
٣. شهادة الماجستير وبيان درجات الماجستير.
4. شهادة الدكتوراة.
٦. أية مؤهلات أخرى.
٧. شهادة الخبرة من مكان عملك.
- شهادة المززاولة او شهادة النقابه الى بتفيد انك مقيد وشغال بمجال التحاليل اخصائى
٨. باسبور ساري الصلاحية (خلي بالك: بلاش تخلي اسمك خماسي في حتة واسمك رباعي في حتة تانية، بمعنى: حاول إن يكون اسمك في الباسبور والشهادات رباعي ونفس الاسم، ولو هتطلع شهادات إنجليزي - لأي سبب- لازم يكون اسمك فيها مكتوب زي الباسبور تماما.
١٠. صورة حديثة خلفية بيضاء (٤*٦).
١١. لازم تعرف الرقم البريدي لمنطقتك أو أقرب مكتب بريدي لك
--------------********-----------
ثانيا: اسحب كل الوثائق السابقة على Scanner
بصيغة pdf،
والصورة الشخصية بصيغة jpeg
بحيث لا يتعدى حجم أي ملف 1MB (ولو حتى بزيادة 1KB)
السجل الأكاديمي معاك حجم لغاية 2MB
--------------********----------
ثالثا: بريد الكتروني شغال
وفاكر كويس الpassword بتاعته
ومتصفح "Firefox" ولو مش عندك نزله ضروري.
--------------********-----------
عندك كمبيوتر ووصلة انترنت (بلاش WiFi)
وبتعرف تقرأ انجليزي
يبقى استعد
--------------********-----------
أول حاجة:
اعمل Account على موقع ممارس
علشان في الآخر تأخذ رقم أحقية (eligibility number ) للتسجيل في امتحان البرومترك (عن طريق موقع الprometric) ورقم أحقية آخر لتوثيق الشهادات (عن طريق الDataFlow)
ازاي هتعملها
الفيديو ده هيعرفك كل حاجة
https://youtu.be/bvZ90fdWLZs
وده عنوان موقع ممارس
http://www.scfhs.org.sa/en/eservices/Momares/Pages/default.aspx
بعد ما تستوفي كل حاجة على الموقع
هيبعتولك رسالة على البريد الالكتروني وعلى موبايلك كمان بأنه تم قبولك وإصدار رقم أحقية لدخول امتحان البرومترك وتوثيق الشهادات والرسالة فيها رقم لكل واحد حافظ عليه
ملحوظة: لا قدر الله لو فيه مشكلة في البيانات او الوثائق التي أدخلتها
سيرسلون لك التفاصيل المطلوبة وستدخل على موقع ممارس مرة أخرى لتظبيط الأمور.
كما يمكنك متابعة حالة طلبك من خلال الaccount بتاعك أيضا على ممارس.
*خلي بالك في البريد اللي هيجيلك في رقم الأحقية فيه
لينك لموقع الPrometric
ولينك آخر لموقع الDataFlow
وهذين اللينكين هما أسهل طريقة لدخول إلى الموقعين.
*لو تاريخ شهادة عندك بالشهر (م. ديسمبر ٢٠٠٥)
اكتبه بتاريخ آخر يوم في هذا الشهر (م. ٢٠٠٥/١٢/٣١)
-----------********-----------
ثاني حاجة: التسجيل لامتحان البرومترك
(كله بالانجليزي)
(تكلفة الامتحان ١٠٠ دولار أمريكي)
*خلي بالك إن رقم الأحقية صالح للتسجيل لمدة ٣ شهور من إصداره (يعني لك أن "تُسَجــِّل" به على موقع البرومترك في أي يوم خلال ٣شهور من إصداره)
من وجهة نظري حدد ميعاد الامتحان حسب الوقت اللي يناسبك ولكن لو ربطت ميعاد الامتحان بالمذاكرة يبقى غالبا مش هتعرف تحدد ميعاد ( لأن ما فيش حد فينا بيحب يزنق نفسه)
فالأفضل شوف إنت ممكن تخلص مذاكرة غي قد إيه بالتقريب وحدد ميعاد الامتحان على طول علشان تذاكر بجد. وما تبقاش براحتك
التسجيل في الموقع: ممكن تبحث عن موعد محدد أو تبحث عن المواعيد المتاحة خلال ٣ شهور بدء ً من شهر معين أنت نختاره م. ثلاثة شهور بدء من شهر يونيو ٢٠١٦ مثلاً.
اسم الامتحان في خانة الاختيارات
Saudi Licensing Exam
الوثيقة التي ستسجل رقمها في الموقع "Government ID" هي رقم الباسبور.
والمكان الوحيد في القاهرة هو AMIDEAST
في المهندسين
وخلي بالك ممكن تختار بين عدة مواعيد في اليوم الواحد: ٩صباحا، ١١صباحا،١٢،٥ ظهرا، ٢ ظهراً.
الحقيقة أنا ما لقتش فيديو يقرب الموضوع أكثر من الفيديو ده
http://youtu.be/Luf_2j_oPV8
https://youtu.be/YWWXect6jUA
عند إتمام الأمر بنجاح هيبعتوا لك رسالة تأكيد على البريد الالكتروني
--------------********-----------
ثالثاً: الDataFlow
(كله بالانجليزي)
(تكلفة التوثيق ٣٠٠ ريال سعودي للشهادة، يعني الاتنين=٦٠٠ ريال)
خلي بالك البرومترك ليس له علاقة بالداتا فلو لا زمانا ولا مكاناً ولا أي حاجة
وممكن الdataflow يتأجل لبعد ما تسافر السعودية.
لكن الأفضل بالنسبة للبرومترك أن تعمله قبل ما تسافر علشان تبقى براحتك (لو لا قدر الله ما جبتش الscore المطلوب من أول مرة)
شرح الداتا فلو هتلاقيه في الفيديو ده:
https://youtu.be/WmpGf4kSG9I
*في الdata flow:
أول صفحة: بيانات شخصية.
ثاني صفحة: المؤهل المراد توثيقه.
ثالث صفحة: شهادة الخبرة المراد توثيقها
رابع صفحة(license 1): الترخيص
ما لكش دعوة به، لأحسن هتدفع كده ٣٠٠ ريال زيادة
فقط عند هذه الصفحة، اضغط skip ثم بعد ذلك اضغط على save & continue
*لو فيه أي تعليقات بيبعتولك رسالة بها على البريد الالكتروني>>> اعمل اللي هيطلبوه منك من خلال الaccount بتاعك على موقع الdataflow اللي ممكن توصل له بسهولة من اللينك الموجودة في البريد الالكتروني اللي فيه رقم الأحقية
عند إتمام الأمر بنجاح هيبعتوا لك رسالة تأكيد على البريد الالكتروني
-----------********-----------
فيه نقطة مهمة:
المشرفين على المواقع ده بَشَر مثلنا تماماً، وممكن يفهموا حاجة غلط، أو ما يبقاش الأمر عندهم بصورة واضحة، لذلك لما يبعتوا لك رسالة بطلب معين او تصحيح حاجة معينة
حاول تعملها، ولو انت شايف إن الطلب ما لهوش لازمة >>>، وضَّح لهم التفسير المناسب مكتوباً في خانة الcomments المتاحة على الصفحة في الaccount بتاعك، وإن شاء الله هتلاقي تجاوب كويس
أمثلة:
١. لو حد لسه مخلَّص الزمالة: بتطلع "شهادة مؤقتة" ، ولمَّا بترفعها على الموقع بيقولوا لك: طلبك مرفوض، إحنا عاوزين شهادة دائمة
لو كتبت في الملاحظات إنك حديث التخرج من الزمالة والشهادات المتاحة حاليا لأي خريج زمالة حديث هي المؤقتة فقط>>>> الأمور بتمشي.
٢. كلنا في وزارة الصحة، تاريخ التعيين (هو تاريخ حركة التكليف من الوزارة حسب السنة) وليس هو بالضرورة تاريخ استلامك للعمل
بتوع الdataflow يقول تاريخ العمل اكتبه تاريخ التعيين:
فتقول لهم: تاريخ التعيين هو تاريخ الالتحاق بوزارة الصحة المصرية
أما بدء العمل الفعلي بوظيفة كذا فهو بتاريخ كذا.
* ومن وجهة نظري أحسن حد يفهم التفاصيل دي ويرد عليها هو "أنت" ودي أهمية قيامك بالموضوع.
* الموضوع لا يأخذ وقت طويل في الرد بس أهم حاجة تابع البريد الالكتروني بتاعك بانتظام
-----------********-----------
وأخيراً: لا تنسونا من صالح دعائكم
ليست هناك تعليقات:
إرسال تعليق