مش أول مره اعراض كورونا تظهر ف العالم والناس تتخض وتخاف ، نفس الاعراض نفس السبب نفس المرض نفس العنايه والرعايه الصحيه موجوده معانا كل يوم وحوالينا من زمان في مصطلح الالتهاب الرئوي pneumonia ، بس المره دي الناس خافت وافتكرت ان فيروس كورنا جديد ع العالم بمصايبه والناس الي بتموت..
لعلمك فيروس كورونا بيسبب التهاب رئوي ، بس بما ان التهاب الرئوي أساسا موجود من زمان وبيجي بسبب البكتريا او الفيروسات او الفطريات ومعدي وبردو عشان تتجنبه بتغسل ايدك باستمرار وكمان خطورته بتبقي غ حسب المريض زي الي مناعته ضعيفه والي سنه كبير والي عنده أمرأض زي القلب والضغط والسكر والي بيدخنوا
إومال لما كل ده موجود قبل كدا الناس متخضضتش ليه ولا لما فيروس كورنا ظهر خلي الناس تتخض ، هما خايفين من كورونا فعلا ولا من الالتهاب الرئوي ؟!
اي حد دلوقتي هيقولك انا خايف من الكورونا لكن علميا الخوف مش بسبب الكورونا الخوف من ان لسا مفيش مصل لعلاجها ، ما كل اسباب الالتهاب الرئوي من فيروسات وبكتريا وفطريات تم اكتشاف مضادات حيويه وأمصال لهم لكن صاحبنا كورونا ده الي لسا مكتشفوش له علاج!
دلوقتي نشيل كورونا كدا ونتكلم عن الالتهاب الرئوي وهتعرف ان الي الكورونا بتعمله ، موجود من زمان وحواليك بس انت مش حاسس!
الالتهاب الرئوي عباره عن تلوث في الرئتين بسبب دخول ميكروب يا بكتريا يا فيروس يا فطريات ، المفروض ان ربنا حطلك حمايه ف مناخيرك تمنع دخول الميكروبات زي المخاط والشعر الصغير الي موجود جوا الانف ، بس الميكروبات دي تخطتهم وعدت للرئتين ودخلت ف اعماق الرئتين وقررت تستقر هناك.
الميكروبات دي بتنتشر بعد كدا ف كل افرازات الجهاز التنفسي من بلغم وافرازات بتطلع وانت بتعطس والمخاط بتاع سيلان الانف والقطرات الي بتنزل من الانف ، وطبعا اي حد سليم بيلمس او بيتعرض للافرازات دي او لمس سطح عليه الافرازات دي وبعدين لمس العين او الفم بإيده فهو معرض للالتهاب الرئوي (إتخضيت دلوقتي عرفت ان مش كورونا لوحده الي بيعمل كدا) .
الالتهاب الرئوي أنواع وكل نوع ع حسب المكان الي جالك منه.
1- لو الالتهاب أصيب رئه واحده من الاتنين ساعتها هيسموه lobar pneumonia
2- لو أصيب الرئتين ساعتها هيمسوه double pneumonia
3- لو جالك وأنت بتمارس شغلك عادي والحياه جنبك زي الفل ساعتها هيسموه community acquired pneumonia
4- ممكن تبقي في المستشفي بتتعالج من مرض تاني فيجيلك التهاب رئوي وساعتها هيسموه hospital acquired pneumonia
5- ممكن تبقي ع جهاز التنفس الصناعي ويجيلك وساعتها اسمه ventilator acquired pneumonia
لو أنت صحتك تمام وزي الفل لا عندك مرض القلب ولا الضغط ولا السكر ولا الكبد المزمن ولا بتدخن ولا أنت ضعيف المناعه ولا عندك سوء تغذيه أو عندك مشاكل ف الرئتين او بتاخد ادويه لحموضه المعده، فالالتهاب الرئوي هيقعدوه اسبوعين تلاته ويمشي لوحده ولا محتاج تروح مستشفي ولا أي حاجه قعده البيت هتخليك تخف (وطبعا نقولك هنا اقعد في البيت عشان كورونا بردو)
أعراض الالتهاب الرئوي
- سخونيه ورعشه
- كحه
- عطس وسعال (مصاحب بخروج بلغم)
- ألم في الصدر (هتحس بيه وانت بتاخد نفسك او بتكح)
- إحتقان في الزور
- ألم ف العضلات
- صداع
- غثيان
- ضيق تنفس
الالتهاب الرئوي لو جالك بسبب فيروس (زي مثلا كورونا) او بكتريا او فطريات فأعراضهم متشابهه.
الالتهاب الرئوي بيجي بسبب البكتريا وده اكتر سبب له وساعتها بتاخد antibiotics تحت اشراف الدكتور ولما تحس بتحسن ميوقفش غير بعلم الدكتور وكمان ف نوع من البكتريا دي اسمه mycoplasma pneumoniae انت عارف ان البكتريا دي مقاومه للعلاج يعني تخيل لو جاتلك هتسبب التهاب رئوي وهي مقاومه للعلاج وتخيل كمان ان كل سنه حوالي 2 مليون شخص ف الولايات المتحدده بيصابوا بيها (يعني هما مخافوش من دي وخافوا من الكورونا ! ) الإعلام بردو بيشعلل الدنيا ويخوفك من خيالك !
اما لو كان الالتهاب الرئوي بسبب فيروس (عندي فيروسات كتير بتسببه كورونا بس الي لسا ظاهر علينا)
أشهرهم فيروس الانفلونزا influenza virus ، اه الانلفونزا الي بتجيلك ممكن تسبب التهاب رئوي ، وهي اسمها انفلونز موسميه يعني لها معاد من كل سنه بيبدا من أكتوبر وينتهي ف شهر مايو ، واعراض الانفلونزا هي :
- سخونيه ورعشه
- الم في العضلات
- انسداد في الانف
- احتقان في الزور
- ضعف
وعلاجها بيكون انك ترتاح في البيت وتشرب سوايل كتير وتاخد خافض الحراره ، بس وهتخف وتبقي زي الفل..
او ممكن يجيلك التهاب رئوي بسبب البرد العادي ، البرد العادي ده بيجي بسبب فيروس اسمه Rhinovirus ودي الي بيسبب لك البرد واعراض البرد :
- احتقان في الزور
- عطس وسعال
- سيلان الانف
- الم في العضلات
- فقدان الشهيه
أظن دلوقتي لو قلت دور الانفلونزا هي دور البرد العادي الي بيجيلك هنعملك بان من البيدج
في تحاليل بقا للالتهاب الرئوي ده :
1- CBC
صوره الدم الكاملة وهتلاقي فيها نسبه wbcs متغيره عشان طبعا الالتهاب ده بسبب عدوي فأكيد WBCS هتتغير عن الطبيعي.
2- ABG test
تحليل غازات الدم ( هتلاقي التحليل ده ف اول كومنت )
لو شكينا ان الالتهاب الرئوي بسبب البكتريا فيتعمل مزرعه البصاق ( sputum culture )
العينه عباره عن بلغم في علبه معقمه من المعمل
شرط التحليل ( ان العينه تبقي الصبح عايزين اول عينه ، وكمان قبلها بساعه او ساعتين متأكلش ، وقبل العينه تغسل سنانك وتشطف فمك بالمايه وتعمل العينه ف المعمل ف علبه معقمه عشان عايزينها فريش)
لو المزرعة طلعت ايجابيه يعني في بكتريا يبقي كدا الالتهاب الرئوي بسبب البكتريا.
لو طلعت المزرعه سلبيه يبقي كدا الالتهاب الرئوي موجود صحيح بس مش بسبب بكتريا بسبب فيروسات او فطريات
في الحاله دي اتعمل لكل فيروس تحليل خاص بيه والي منهم دلوقتي تحليل فيروس كورونا ، فلو طلع اي نوع فيروس ايجابي يبقي هو الي سبب الالتهاب الرئوي ده.
مسمهاش بقا تحمي نفسك من كورونا ازاي ، اسمها تحمي نفسك من الالتهاب الرئوي ازاي ؟
- غسيل اليد باستمرار
- تعقيم الاسطح بالمطهرات
- تجنب الاتصال المباشر بأي مريض بيعاني من مشاكل ف الجهاز التنفسي
- أعطس في منديل خاص وكح بعيد عن الي قدامك.
ولو عندك التهاب رئوي فأنت في بيتك ترتاح وتنام وتشرب سوايل وتاكل خضار وتقوي مناعتك وتبطل سجاير وأسبوعين وهتخف لو بعد اسبوعين الامور زادت خطر يبقي ع المستشفي ع طول.
ليست هناك تعليقات:
إرسال تعليق