الرئتين

أكيد طبعا حسيت ف يوم ان نفسك مكتوم ومش عارف تتنفس او عندك صعوبه ف التنفس او كأن ف حاجه كاتمه ع نفسك ومفهمتش ايه ده! 

وأكيد دلوقتي جه ف بالك ان الموضوع مادام فيه رئتين يبقي هتفتكر ان ده مكان كورونا الي بتروح تبوظه! 

وعمرك حتي ما سألت نفسك ليه الناس الي بتتنتحر بتقطع شرايينها مش بتقطع اوردتها!  

تفتكر لو شربت الكحول الي بتطهر بيه ايدك زي ما ترامب قال كورونا هيموت ولا. انت الي هتموت ؟ 

الرئتين عباره عن 2 موجودين ع اليمين والشمال للجسم ف منطقه الصدر ، واخدين من الاسفنجه كدا ومتحوطين بالقفص الصدري ، الرئتين متوصل بيهم حاجه اسمها القصبه الهوائية الي هي بتدخل الهوا للرئتين وف نفس الوقت بتطلع الفضلات من الرئتين!  (الي هي ثاني اكسيد الكربون )

الرئتين مكونه من حويصلات هوائيه الحويصلات دي الي بيحصل فيها تبادل الغازات الي انت بتدخلها جسمك عن طريق انك تتنفس وبيكون فيها الاكسجين ودي تسمي الشهيق ، وبردو بيحصل فيها فلتره الدم من ثاني اكسيد الكربون الي هو يعتبر من قمامه الدم فلازم يطلع بره ، فأنت وقتها بتطلع هوا بره الي هو الزفير (عشان كدا الشهيق والزفير مهمين)

الرئتين كمان بتعتبر مخزن للدم ، لانها عندها حوالي نص لتر من الدم يعني 9% من حجم دم جسمك كله. فلما انت يحصلك نزيف وبدا جسمك يفقد دمه هنا الرئتين بتعوض الدم ده ع قد ما تقدر. 

الدم بتاعك لازم يعدي ع الرئتين ، اومال القلب بيعمل ايه هنا ؟

الدم الي ماشي ف الجسم كان فيه اكسجين وخلص الي هو غذاء للاعضاء والانسجه بس بقا فيه دلوقتي Co2 الي هو فضلات الدم ، طبعا الكلي مش هتفلتر دمك من الغازات دي دي هنا شغلانه الرئتين   الدم بفضلاته دي هيدخل القلب من الناحيه اليمين والقلب عامل زي الماسوره هياخد الدم يدخله للرئتين من الناحيه الشمال ، الرئتين تاخد co2 وتملاه ب الاكسجين بعدين الرئتين ترجع الدم النضيف الي مليان اكسجين ده للقلب تاني ويبدا القلب يوزع الدم المتغذي ع كل أعضاء الجسم والشرايين عشان الجسم يتغذي. 

حصل اي خلل ف نسبه الاكسجين ف الدم او نسبه ثاني أكسيد الكربون ف الدم يبقي كدا ف مشكله ف الرئتين وان كدا كفاءتها ضعيفه ، هل ف حاجه ف التحاليل تحددلي كفاءه الرئه زي الكبد والكلي كدا 

1- تحليل غازات الدم ABG 

= Arterial Blood Gases

 الشريان اسمه Artery  عشان كدا التحليل ده عينه دمه بتكون من الشريان ، شرطه الاول  ع عكس باقي التحاليل بتسحب عينه الدم من الوريد 

اشمعنا ؟

لان الشريان ف دمك بيشيل الاكسجين والوريد ف دمك بيشيل ثاني اكسيد الكربون فأنا عايز الشريان هنا عشان الاكسجين ، لو حصل والعينه كانت من دم الوريد يبقي يتكتب ف التقرير ان عينه الدم كانت وريدي ، لان نسبه اختلاف قيم الاكسجين ف الوريد والشريان كبيره جدا .

التحليل ده بيتعمل عشان تشوف الرئتين بتوعك اخبارهم ايه ولعلمك هو التحليل الوحيد الي بيقدر يقيم الرئتين ، وبردو بيديك نتيجه عن اثر العلاج الي بتاخده لو بتعاني من اي مرض ف الرئتين ، وبردو بيشوف حموضه الدم وبردو لو انت داخل عمليه جراحيه فمهم التحليل ده. 

ازاي تسحب عينه من الشريان وازاي تعرف أصلا ان ده شريان ؟

الشريان لون دمه فاتح احمر فاتح وكمان المكان الوحيد الي تقدر تسحب من عينه دم هو مكان الرسغ بتاع الايد الي فيه شرايين ، هو يعني باقي الجسم مفهوش شرايين   ما أسحب من اي حته زي اي تحليل 

لا استني عندك ؟

الشرايين عموما موجوده جوا اعماق الجسم مش ظاهره ع ايدك وجسمك من بره ، الي ظاهر بره ده هو الوريد لانه دايما بيكون سطحي ، فالمكان الي فيه شرايين واضحه وتقدر تسحب منها هو رسغ الايد ( عشان أقربلك الصوره اكتر هو المكان الي الناس بتقطع شرايينها منه  ) اهو الحته دي الي بيتسحب منها التحليل ده ، وبعد لما تسحب االعينه خلي بالك الشريان فيه نبض يعني لو روحت مسكت الحته دي فتحس بالنبض فعشان كدا لما تسحب عينه الدم تضغط بقوه ع مكان السحب ده ع الاقل لمده 5 دقايق عشان توقف النزيف عكس طبعا العينه من الوريد بتحط البلاستر ع طول من غير ضغط. 

نيجي بقا للسؤال المهم ، ليه الي بينتحر بيقطع شرايينه مش بيقطع أوردته ؟  

لو واحد جاب موس وفتح الفتحه دي ف رجله تفتكر هيموت  زي الي راح فتح الفتحه دي ف رسغ الايد الحته الي فيها شرايين! ، الحته دي فيها شريان رئيسي فيها نبض انت كدا بتقطع نبض  ، الجسم اه فيه شرايين بس مش واضحه زي بتاع الرسغ ده الشرايين التانيه متعمقه ف جسمك من جوا وصعب تحدد مكانها بالنظر عكس الوريد   والشريان طالع من القلب يعني زي ايد الاخطبوط كدا جزء منه، انما الوريد داخل للقلب زي الي بيتلزق ف القلب كدا ويقوله انا منك ومش عايز تعترف بيا ليه   

شروط التحليل 

طبعا هو ملهوش شروط ، لكن لو بتاخد علاج بالاكسجين فبيوقف قبل التحليل ب نص ساعه تقريبا وممكن الدكتور ميقولكش توقفه بس ساعتها هتحس كيمه الاكسجين الي اخدتها من العلاج. 

التحليل عباره عن اربع مكونات بتشوفهم ف تقرير المعمل

1- Partial pressure of oxygen = PaO2

ده بيقيس الاكسجين الدايب ف الدم ، وكفاءته ف انه يتحرك من الرئتين للجسم والنسبه الطبيعيه بتاعته 80-100 والنسبه بتختلف ع حسب انت عايش ف مرتفعات ولا لا يعني فوق سطح البحر لان ده بياثر ع الأكسجين. 

2- Partial pressure of Co2 = Paco2 

ده بيقيس نسبه ثاني اكسيد الكربون الدايب ف الدم وكفاءته ف انه يتحرك من الدم للرئتين والنورمال بتاعه من 35- 45 

3-  PH of blood 

 ده بيقيس تركيز الهيدرجين ف الدم يعني بيقولك الدم حامضي ولا قاعدي هو الدم عموما يعتبر متعادل لا حامضي ولا قاعدي لكن لو نسبته قلت يبقي كدا ف حموضه الدم وحموضه الدم غير حموضه المعده  حموضه الدم دايما بتكون بسبب ان ف فشل كلوي او قلبي او تسمم يعني ف مصايب هنا  مش شويه لبن يعالجوا الموضوع، والنورمال هنا 7.35 - 7.45

4- Bicarbonate 

ده بردو تحليل غازات الدم بيقيسه معاه ، بس ده فايدته ان لو لقي دمك بقا حامضي او قاعدي يعني مش طبيعي يروح يعدله ويخليه متعادل فبيشتغل ك buffer. 

الاربع مكونات دول بيتحدوا مع بعض يعني مينفعش واحد فيهم يبقي عالي والباقي نورمال ومينفعش نصهم يبقي نورمال وواحد واطي والتاني عالي  

- لو مثلا رقم 2 , 3 , 4 قلوا عن الطبيعي ، يبقي كدا من المحتمل ان ف فشل كلوي او عندك سكر بس مش مظبوط أو حصلك تسمم بالايثانول (الي هو الكحول الي بتطهر بيه أيدك  )  الدم هنا بقا حامضي .

- لو مثلا رقم 2 , 3 ,4 أعلي من الطبيعي ، يبقي كدا من المحتمل ان ف فشل قلبي او عنصر البوتاسيوم ف الجسم قليل او ف تشمع الكبد cirrhosis ، لان الدم هنا بقا قاعدي. 

- لو مثلا رقم 3 أقل من الطبيعي ، ورقم 2, 4 أعلي من الطبيعي 

معني كدا ان ف مشكله ف الرئه او أزمه او عندك مرض فيها  او ف انسداد ف مجري التنفس .

- لو مثلا رقم 3 اعلي من الطبيعي ، رقم 2 , 4 أقل من الطبيعي ، يبقي كدا من المحتمل ان ف التهاب رئوي (زي الي الكورونا بتعمله ف الرئه  ) او عندك مثلا اصابه ف المخ او مثلا بتاخد ادويه معينه.