الشروط الواجب توافرها في معمل التحاليل للحصول علي ترخيص المكان كمعمل تحاليل طبية

 علشان تاخد موافقة بترخيص معملك من اول مرة 2020 ( كيمياء حيوية ) 

سيتم الدعم بصور لكل التفاصيل .. 

.. التزم بالاتي حرفيا ..

لو حد من الزملاء عنده ملاحظات يضيفها.. 

 طبعا بعد ما تقدم الاوراق اللازمة للترخيص كلها في المعامل المركزية بوزارة الصحة .. وساذكرها في اخر المنشور .. كونك كيميائي أخصائي تحاليل طبية خريج كلية العلوم وحاصل علي دراسات عليا في مجالك ايا كان هذا شرف وفخر لكل علمي خريج كلية العلوم في شتي المجالات  .. ومن يعمل علي التقليل من شانك بشكل او باخر اما عنده عقدة نقص او مش عارف يصل لما انت عليه او سلو بلدنا مصر للاسف .. اللهم لا تجعل في قلوبنا مثقال ذرة من كبر او غرور او حقد او كره الخير للغير .. وابعد عنا كل من في قلبه كل ذلك او بعضه ..  

اليكم الاتي : 

1 - صالة الاستقبال يكون فيها سلة بكيس اسود ويفضل تكون بغطاء .. مكتب وعليه كمبيوتر يفضل يكون مش عليه غير البرنامج الخاص بكتابة التقارير ويفضل يكون مش متسجل عليه اي بيانات لان ممكن يطلب منك تشغل الكمبيوتر .. ولو عليه برنامج لسه جديد زي احمد لاب مثلا مجاني وهيقضي الغرض .. وطابعة فيها ورق التقارير وبجانبها الاظرف او الفولدرات وطبعا لازم تكون نفس الصيغة الموجوده علي اليفط وهي كالاتي ..

معمل ......... للتحاليل الطبية الكيميائية 

الاسم ثلاثي او رباعي مسبوقا بحرف ك او من غير افضل 

أخصائي التحاليل الطبية لو مكتوبة في البطاقة .. لو مش مكتوبة في البطاقة الافضل لا تكتبها .. 

بكالوريوس العلوم جامعة ............

دراسات عليا في الكيمياء الحيوية التحليلية جامعة .................

او دبلوم الكيمياء الحيوية التحليلية جامعة ......................

الصيغة دي تكون علي اليفط والورق والاظرف او الفولدرات ..

2 - الارضيات تكون سيراميك وغالبا بيعلقوا علي البلاط المزايكو ويطلبوا تغييره والحوائط دهان يكون جيد والمكان نضيف .. ولو فيه باب بلكونة يفضل وضع سلك او عمل ضلفة برواز خشب بسلك تفتح للخارج لو باب البلكونة مش فيه زجاج وسلك .. ممكن تشيل الشيش الخارجي وتعمل برواز سلك كانه ضلفه يفتح للخارج .. ومن الداخل باب البلكونة اللي بزجاج.. وبعد كده براحتك لو عايز تركب الشيش تاني

..

يا ريت لو حلق الابواب الخشب تكون مدهونة لاكيه لانهم بيعلقوا عليها .. 

3 - طفاية الحريق 6 كيلو يكون المؤشر علي الاخضر يعني مليانة وشغالة .. ومش لازم يكون معك فاتورة بها الا اذا طلبوها منك يفضل تكون شاريها .. ويتم تعليقعها علي الحائط في الطالة او تكون علي مستوي اعلي من مستوي الارض ممكن تضعها علي ترابيزة مثلا .. 

4 - وضع لافتات توجيه علي كل غرفة ( المعمل ممنوع الدخول ) - دورة المياه - غرفة السحب .. وممكن غرفة المكتب هي نفسها غرفة السحب لأن مفيش شرط بيقول مكتب ممكن يتم كتابة لافتة بغرفة السحب مدمج بها كلمة مكتب المدير - غرفة النفايات ..

5 - الشقة تكون مستقلة ولا يوجد بها اشتراك مع شقة اخري مثل وجود باب مغلق مثلا وفاتح علي شقة مجاورة فلازم يتشال الباب ويتم بناؤه بالطوب .. 

وتكون الشقة عبارة عن صالة للاستقبال وصالة الاستقبال ينفع يبقي فيها المدير المسؤول عن المعمل .. وغرفة للمعمل وغرفة لسحب العينات وحمام .. لو الشقة عبارة عن غرفة ومطبخ وحمام وصالة ممكن يتم عمل المطبخ كمعمل لو مساحته تسمح .. مساحة الشقة غير مرتبطة بمقاسات .. 

6 - وجود تهوية جيدة وخاصة في غرفة المعمل سواء كان فاتح مباشرة شباك علي الشارع او فاتح علي منور .. وعلي الشبابيك كلها سلك للناموس والحشرات ويفضل للبلكونات ايضا سلك .. 

7 - غرفة النفايات ان تم طلبها منك في بعض المحافظات  .. تكون فيها حوض ومصدر مياه وبلاعة صرف ويكون فيها الاوتوكلاف او يكون داخل غرفة المعمل مفيش مشكلة .. ويكون عليها باب خشب او الوميتال وبها شباك سلك ايضا يعني تهوية جيدة .. يعني لو عندك مطبخ تعمله غرفة نفايات يبقي زي الفل ..

وفيه كلام إنها تخص العلاج الحر التابع لمحافظتك في مديرية الصحة ولم يتم طلبها من قبل اللجنة بالمعامل المركزية القادمة من وزارة الصحة بالقاهرة .

وغالبا في المحلة بيطلبوها اساسي ..

8 - الحمام يكون نضيف وفيه كلور وديتول وبريل .. وشباك بسلك ..

ولو فيه ماسورة جاية من المطبخ علي الحمام وظاهرة الافضل تتعدل بحيث تكون مش ظاهرة فوق السيراميك .. 

9 - غرفة سحب العينات يكون بها كرسي سحب بمساند او كرسي انتريه جلد بمساند .. وترابيزة السحب تكون استانلس او خشب وعليها رخام .. ويكون عليها انابيب السيرم سواء كانت جيل او وزرمان .. وقطن معقم داخل علبة استانلس خاصة بها وممكن يبقي في كيس القطن نفسه ان لم يكن موجود علبة .. وسرنجات وماسحة كحولية ولاصق طبي وتورنيكيه ..وسلة بغطاء وكيس احمر وسيفتي بوكس وسلة اخري بكيس اسود ..

10 - غرفة المعمل

-لو فيها دولاب خشب صغير او كبير يتشال .. 

- يكون فيها بنجات رخام مش لازم يكون المكان كله رخام ولكن علي الاقل حوالي مترين عرض او اكتر شوية حسب المساحة المتاحة معك .. 

- ويكون فيه تحت البنجات ارفف وادراج الوميتال لازم ..وتكتب ورقة علي كل ضلفة ودرج بالمحتوي داخلها .. 

- وتحت الحوض اللي داخل غرفة المعمل يتم تقفيله ايضا بضلفة الوميتال وبلاعة الصرف تكون خارجية او يتم قفل البلاعة بسيرامك واسمنت .. 

- ولا يوجد بها مراوح سقف او حائط ..

- وتكون التهوية جيدة داخل غرفة المعمل يا اما تركب تكييف ..

- مفيش اي ترابيزة تكون داخل المعمل .. ومفيش كمبيوتر ايضا ..

- التلاجة تكون كويسة وبها ترمومتر لمتابعة درجة الحرارة من 2 الي 8 درجة ما تزيدش ولا تقل عن كدة .. ويتم عمل ورقة بمتابعة درجة حرارة التلاجة ( اليوم والتاريخ ودرجة الحرارة ) وتتعلق علي باب التلاجة من الخارج .. 

- المحاليل داخل التلاجة تكون كاملة مش مجرد فايل او 2 ..وتكتب ورقة ايضا علي باب التلاجة ( اسم المحلول .. الشركة .. تاريخ انتهاء الصلاحية ..) 

- يفضل تكون التلاجة مش بتعمل تلج .. ولو مش عندك غيرها ممكن تفصلها شوية تفك التلج من الفريزر وبعد كدة تبقي تشغلها عادي .. 

- محاليل الكيميا داخل التلاجة ( السكر والكالسيوم واليوريا والكوليسترول والترايجلسرايد واليوريك اسيد والالبومين والانزيمات .. )..

- خارج التلاجة علي رف او علي البنجات يكون فيه الكريات والبيلليروبين .. 

- سلة بكيس احمر مغطاه وسيفتي بوكس .. 

- بابيتات .. 

- سنترفيوج ..

- جهاز كيميا شغال ..

- حضانة .. 

- ميكروسكوب كامل العدسات .. 

- تبس اصفر وازرق وانابيب وزرمان ..

- مناديل ورق .. واكياس قطن .. 

- مياه مقطرة مكتوب عليها انتهاء الصلاحية .. 

- كحول اسبراي 

- علي الحوض او اسفل الحوض داخل المعمل يكون فيه منظفات وبيريل وديتول وكلور ومعقم لليد ..

ملحوظة مهمة جدا .. بعض الشقق فيها حمام مستقل داخل غرفة وبعض الزملاء يتناسي الغاؤه داخل غرفة المعمل .. فلو أمكن يتم غلق الباب وبناء الحائط تماما وتحويل مساره الي اقرب غرفة أخري بجواره أو يتم إلغاء القعدة وغلق البلاعة بداخله وتحويله الي ركن عادي داخل غرفة المعمل يتم استغلاله في اي شيء آخر .. لأن إلغاء بلاعة الصرف داخل حجرة المعمل واجب فمن باب اولي عدم وجود حمام .. 

.........................

11- عندك 3 يفط رئيسية اول يافطة علي باب المعمل - والثانية علي واجهة المعمل او العمارة او البلكونة - الثالثة تكون علي عامود نور بسهم يشير الي المعمل سواء كانت في نفس اتجاه المعمل او في الجهة الاخري من الطريق .. ولازم يكونوا نفس الصيغة والكتابة زي بعض .. حبيت تزود يفط يا ريت يكونوا نفس الصيغة ايضا .. ما ينفعش تكون ( معمل ......... للتحاليل الطبية ) لازم تكتب ( معمل ......... للتحاليل الطبية الكيميائية ) .. والا سوف يتم التعليق عليها ووقف الترخيص عليها .. وما ينفعش تعمل بوستر وتلصقه علي يافطة قديمة .. لازم البانر يكون مطبوع كامل مستقل ..

التزمت بكل ده حرفيا تبقي صاحبي وحبيبي وكفاءة وهتاخد الترخيص من اول معاينة باذن الله .. ما التزمتش يا ويلك يا سواد ليلك وهيتم رفض الورق وتقدم من اول وجديد وعيش حياتك وانتظر لما يتحدد لك معاد اخر ..

اي سؤال او استفسار من الزملاء الافاضل او اي اضافة او تعديل تحت امركم .. وبالتوفيق للجميع ..

.. 

الاوراق المطلوبة لترخيص معمل تحاليل طبية .. 

1 - عقد ايجار لا يقل مدته عن خمس سنوات مثبت تاريخ في الشهر العقاري من بداية التقديم للترخيص .. 

2 - رسم كروكي من 3 نسخ اصل وصورتين للشقة موضحا بها ابعاد وتفاصيل الغرف والشوارع والحدود والجار و مختوم من مهندس نقابي ..

3 - فيش جنائي موجه للمعامل المركزية بوزارة الصحة .. 

4 - صورة البطاقة الشخصية .. 

5- اصل مزاولة مهنة التحاليل الطبية .. 

6 - صورة كارنيه طبيب ..

ثم تتوجه الي المعامل المركزية بوزارة الصحة الدور الثاني عند مدام مني .. هي محترمة جدا ومتعاونة وهتخلص لك الورق علي طول .. وتشوف لو فيه حاجة مطلوبة منك تعملها وهتدفع فلوس في الخزنة حسب الرسوم المقررة .. وفيه دمغات زي ما تقولك .. هتمضي علي كل الورق المطلوب يا اما لو انت مش موجود او مش متاح تروح بنفسك ممكن تعمل توكيل بذلك ولكن وقت المعاينة لازم تكون موجود بنفسك .. وفي الاخر هتاخد افادة بالمعاينة لحين تحديد المعاينة قبلها بيوم او اكتر هيتصلوا بك .. وما تنساش تختم الورقة قبل ما تمشي .